سماء الخرطوم محتقنة هذا المساء وملبدة بالغيوم وبها دخان كثيف عالق ....!! تبدو وكأنها تريد أن تقول شيئا..........!! لكن العبرة سادا حلقا ....!!
مزاجا معكر ....! وروحا محرقاها ...ووميض ضوء يلوح في الأفق البعيد ......!!!
مالك يابلد ... ....!!؟؟؟ سلامات
إن شاءالله خير ..!! شدة وتزول ...وماتشوف شر ...
خواطر كثيرة تعتمل في رأسي وأنا في سبيل عودتي للبيت في هذا المساء البائس ....السعيد ...!!
وحالة بؤسه لاتخفي عليكم ....!!! وأما لكوني سعيد فذلكم مرده .....إنو كنا كتار الليلة ....وهتافنا عالي ...وصوتنا واضح ...!! وماسكين في بعض ....رغم المتاريس والزمن التعيس .....
الحاجه طبعا بتضرب لي عشرة مرات في الدقيقة خايفة علي من المظاهرات ....ياحليلا
قلتا ليها ي ماتخافي كدا يا أمي دي ما مظاهرات دي مواكب عزة سلمية والناس دي كلها طالعة ....
قالت لي (فوزية ) ذاتا قالت لينا سلمية ....
( هياااااا ( فوزية ) اليقيني تتكلمي في السلمية ..
وعقبت الحاجة ....نان وكت سلمية دا شنو البنشوفو دا .....!!!؟
قلتا ليها ....ضمر همام ما بيرخو للنفس الزمام أهل الطريق .....!!!
قالت لي قلتا شنو ياولد ...!!!
قعدتا اضحك رغم العلي .... قلتا ليها لا لا أبدا ....بتكلم براي ...!!
اقول ليها شنو هسا أمي دي ...!!!
دخلت الغرفة وتمددت في سريري بالقميص والبنطلون
اللابسم ونظرت الي السقف أتأمل مروحتنا العتيقة وهي تدور متكاسلة ...وفِي صوتها أنين من فرط التعب
...!! فمنذ أن وعيت الدنيا وجدتها هكذا معلقة في هذا المكان وقد أدمنت الدوران ....!!!
وخيوط العنكبوت الواهنة فوقها صامدة في تحد وجلد وقد فشلت أجنحتها التي لاتعرف السكون في بعثرة نسيجه البديع والذي يبدو للعيان هشا ضعيفا لكنه مغزول (بحب ) ....عصي علي الزوال ....!!
( أنتم المروحة ....والعنكبوت أنا ..... وفيه سر
لو تعلمون عظيم )
لتواصل االدوران وأنا من تحتها أدور ....!! وقد منحني المشهد كثيرا من الثقة
وبدأت أسترجع اللحظات التي كانت و أنا في عمق تظاهرة اليوم وأصوات الهتافات لازال صداها يتردد في أذني وهي تشق عنان السماء .....
حريةً ...سلام......وعدالة ........والثورة خيار الشعب
رأيت هولاء الشباب بجانبي ...يهتفون
أكاد أري أوداجهم تنتفخ من علو الصياح ...!! ولعمري فهو مخزون سنوات وشهور ...وهواء ساخن يخرج من بين الثنايا والصدور .....!!!
وبمحاذاتهم رجال ونساء من كل حدب ودور
والبنات ديل كمان عجيبات مره واحده ....عيونن كلها عزيمة وإصرار ....!!! وسقوط مطلق لقناع الخوف
شايفات قدام بس ...
ومرات بشوفن كدا ويزغردن ....!!!!
ياربي بشوفن في شنو البنات ديل ....!!؟؟؟
وقوات الامن تطوق المكان ....تفصلنا أمتار .....
تأملتهم مليا ...!!عاينتا ليهم جوووا في عيونم .....
ياخ ديل مننا وفينا..... لماذا يصطفون في الضفة الأخري ....!! ؟؟؟؟
وبعضهم لا أري سوي عيونهم ...فاستعصت علي القراءة
وأظن لسان حالهم يقول ...ولماذا أنتم تتمردون علي الدولة ...!!! ؟وتخرجون عن النظام ....!!!
أمي جاتني داخله في الأوضة قالت لي ( مشاعر) دي
لحدي هسا ما جات ياعلوب ...!!!
ماتقوم تشوف أختك دي وين ياولدي ...بنتصل عليها تلفونا مغلق ....!!! قوم الله يرضي عليك ..!!
تسرب الي نفسي بعض القلق ...ونهضت واقفا أستجلي الأمر .....!!!
و إذا بمشاعر تدخل علينا في هذه اللحظات
ملفلفة ليك بالطرحة لفليف تقيل ....وعيونا ديل حووومر ...وملامحها تبدو مستقرة
المهم دخلت ....فكت الطرحة...... واترمت في الكنيه
وقعدت تتكلم براها ...
غايتو الليلة كتمت فيهم كتمة الجن ...رصو العساكر رص ....ياخ الناس دي اللليلة وقفت وقفة جد ...الله عليكم باخ .....
عرفتها كانت في نص الموكب ...أول مرة اشوفا بهذه الروح .......!!!
من أين لها بكل هذا البريق ....!! البت دي بتذاكر من ورانا ولا شنو ...!!
قالت لي كدي النقوم نشوف الاستديو التحليلي في ( منبرشات )
الزيت هناك ....والشوق وطن ....والحب هدا
قلنا ليها عليك الله أنقلي لينا الموجز ورينا الحاصل معاك ....واغريهن السلام ......!!
دخول منبرشات دا أسهل منو دخول أمريكا ....!!
البوابات تقفيل ....والقناة تشفير ...!!
تضحك ساااي مشاعر .......قالت لي فيك الخير ...!!
وهكذا بدا أن الفعل الثوري تغلغل الي عمق البيوت
وقاموس الحراك دخل الحوش
لا أدري كيف يفكر الجانب الآخر ومدي رؤيته للمشهد هل هو علي قناعة بأننا حالمون مندسون ... أم أنه تعود علي السمع والسكون ....!!
فراعه هذا الخروج الصريح عن النص وبيت الطاعة ....!!
طيب إنتو ليه انشغلتو بي بعض ونسيتونا ....!!!؟
نحن مش برضو (أخوانكم ) في الوطن دا ....!!!
ليه مابتثقو فينا .....!!؟؟
إنتو يعني قايلننا مالنا ...!!؟؟
منو دا الغشاكم وقال ليكم نحنا خاينين دا
ما كان تجربونا .....!! الوطن كيان ما إنسان
جنكم ( تمكين ) ....لما ( مكنتنا ) سيحت ....!!!
نحنا ما دايرين قصور ....وبيوت كبيرة وأرصدة في البنوك ...وكلام زي دا ...!!
قسما بالله نحنا بس دايرين وطن وسترة ....
نصحي الصباح نمشي الشغل والمدارس ...وندي البلد دي عرقنا كلو لاننا بنعشقا ...£! وعايزين نشوفا كبيرة ...
ونلقي اخر الشهر المرتب المابحوجنا لي زول .....ولا يقهرنا من راجل .....!!! البكفينا وبسترنا ...
وكتااااار مننا عايزين حق اليومية بس ....بتصدقو ...!!
شوف الناس دي يقينا عالي كيف ....!!
( الله مادام ما بسألك عن صلاة بكرة حتكون متين ....
بي ياتو وش تسألو من رزق بكرة حيكون كم ....!!؟؟.
( تخجل بس ) ....!!
نحنا عايشين باليقين دا وطلباتنا تشبهو .....
عايزين نتلاقي في صينية الغدا زي زمان ....فيها سلطة خدرا ..ومفروكة طااااعمة بي كسرة ....و( محشي )
( لو الحظ ضرب )
والعيش مرصوص بالجنبات ونحن مرصوصين معاهو بسلامتنا ....وأكاد أحزم أنها صينية كل أهل السودان من حلفا لي ( هناك )....!! ( ياحليل هناك ) .....
والقاسم المشترك فيها صحن ( رجلة ) يمنحنا ( الحديد ) .......والشوق والريد ...
الفكرة ما الغدا .....!! نحنا عايزين اللمة دي في عضما ...!! بنشوف فيها بعض ...!! وبنقوم منها قويين .....!!
طيرتوها وين الصينية دي ....!!!
خلي الصينية ....!!!!! العيش ذااااتو وينو ....!! ؟؟؟
عايزين نشرب شاي المغرب بي مزاااج في الحوش
المرشوش ومندي ...ونمرق نغشي النادي ونمشي الشارع ....ونزور عمتي( بت الناير ) في ( التامنة )ونحضر عقد ود ابراهيم في الجامع ...!!
عايزين تتونس جنب الدكان في تسجيلات الهلال
والمريخ ونهائي كلاسيكو الأرض بين الريال والبارسا
ونمشي نحضر تخريج بت عمك التاج من كلية الهندسة
و أول الشهر ( مصطفي ) حيتخرج من الكلية الحربية ....
ونزور عمك ( المرضي ) عملوا ليهو عملية ( قلب مفتوح ) في مستشفي الشعب ..ومجانا ...!!
لأنو مسكين ماعندو غير قلبو ( المفتوح ) وفاتح علي حب الناس والخير والجمال .....أوا هناك أنبل ....
عايزين نحضر ( عرس ) ( موفق ) في نادي ( الشرطة ) .....!! بدل البمبان بخور تيمان
عايزين من تاني يكون ( الأستاذ ) أهما زول في الحلة .....( ما بحضر الحفلات ....ونفك ليهو الدرب )
عايزين نخيت الجلاليب بي مكنة ( ريد ) وتخلص يوم الوقفة بالليل عشان نلبسا في صباح العيد ونتسالم ونتصافي ونقالد خالاتنا وعماتنا .....
عايزين الشفع يطلعو يلعبو في الشارع من غير ما نخاف عليهم من شيطان الطريق ...!!
عايزين نمشي كلنا المطار لأنو (عبد الرحيم) و أولادو جايين يعيدو معانا من ( فرجينيا) ....وقد قطعو المحيط شوقا ولهفة ...
ماعايزين يجيك واحد يقول ليك جاي من وين وماشي وين ....طالما أنا ما ماشي غلط ولا بعمل في شي غلط ...!!
ماعايزين زول فوق القانون ....!!! مهما يكون
عايزين إنترنت قوي شديد مافي زول يقدر يقطعو
عشان أولادنا ديل رغم أنكم وقفتو ( التصدير ) ...!!
بس هم ماوقفو ( الإستيراد )
كانو بستوردوا علم ومعرفة وثقافة عبر منصات الأثير
ديل ما دايرين توريدات واعتمادات بنكية ....دايرين حبة رصيد ...وشبكة قوية ...!!
عايزين نشوف البلد دي كما يجب أن تكون
انظروا لأثيوبيا التي لاتخفي إعجابها بِنَا لحنا وإنسان أين هي الان ...ورواندا التي قامت من الركام ......
كل دول أفريقيا من حولنا تتألق ...ونحن نزحف في صفوف الرغيف والبنزين ونصدر قرار تاريخيا أن انتهاء الحفلات الساعة حداشر لارجعة فيه .....ومطارنا البائس يتجنب الخريف ....
ونحن من علمنا الدنيا معني أن نعيش وننتصر
بس كدا ...
ياها دي حرية سلام وعدالة البنكورك بيها كل يوم دي .....!!
شفتونا متواضعين كيف حتي في أحلامنا وأمانينا
نراها صغيرة ....!! وترونها كبيرة ......
ترونها غريبة ....وهي أقرب
لذلك نحن في الشارع ....عرفتو ليه نحنا هنا .....
وبمناسبة الشارع دي غايتو المنظر الشفتو الليلة دا لا عرفتا أضحك لا عرفتا أبكي واحده من الكنداكات ديل فكت ليها زغرودة كاااربة
في عسكري من غير ما يشعر هزا بي سلاحو وقعد يبشر .....!!!
عليكم الله وحلفتكم بي الله ما تسألوهو .....!!
والله ماخالف التعليمات .....!! إنها سطوة ( الجينات )
( من أي كوكب قد جاء هذا الوطن ) ...!!
ولا الولد الغمتوهو في ( التاتشر ) حقتكم دي ...!
ولا هاميهو
راااافع علمو .....وكاتم ألمو
اها نوع دا ياهو البكتما فيكم
دي ياها البسموهو الجسارة ..!!
