menu

ضجت شوارع الحي

طارق اللمين


31 ديسمبر 2018

ضجت شوارع الحي
بي نبرة ثورية
كل الشباب بيقول
سلمية سلمية
ارحل كفاك يا زول
حرية حرية
دم الشهيد المات
بنشيلو زندية
والموكب المعمول
طالع بعفوية
من صينية القندول
للقصر سلمية
والعسكري المزلول
اخلاقو جهوية
يضربنا بالمبان
والطلقة حتمية
وين حق اخوك والجار
والقالا سلمية!
تضرب اخوك بالنار
شان الحرامية
موكبنا ماشي اكيد
واحنا ما شوية!
شعبا عظيم وكبير
والثورة محمية
بي كل زول طالع
شايل أمل مية
والمية بي مليون
ومليون بخشو القصر
والقصر قصر الشعب
والشعب حقو كتير
ومن حقو برضو عليك
ترحل طواعية..
يا المجرم المطلوب
لدواعي امنية!
يا السيد الرقاص
ارحل علانية

سلمية سلمية
سلمية سلمية

#موكب_31_ديسمير
#مدن_السودان_تنتفض