قوم قوم ياعبد الحي
خلي كلام الداعيه الني
يلا نلف بي امر الحق
مسيره تطوف ارجاء الحي
نهتف للحريه نكورك
قول البيك واقول البي
لي شن نسكت بس قول لي
وبطلقو في الرصاص الحي
لا في غزه ولا تسني
في امدرمان في نص الحي
الرصاص مطلوق في السهله
جايي عليكا وجايي علي
انت الخايف من اسيادك
نحن الماخايفين من شي
جربناها سنين الظالم
جوع ومهانه ونار الكي
لاتقول لينا خروج علي حاكم
لاتقول لينا الخطبه علي
وماتقولي نلتزم البيعه
قوم بلا بيعه بلا بمبي
نصير الظالم حتما ظالم
نفس المنظر نفس الشي
قلنا ليك الجوع كاتلنا
ح تقولي ووبين واحي؟
بنعرف دين يازول من قمنا
يعني يادووبك ح تقول لي؟
امشي لحافك وعرض أكتافك
بلا بتيخ بلا عبد الحي
------
طارق اللمين
