ما تخاف

ما تخاف
أخوك أنا ود ابوك ( ما بسألك )
أنا همي همك يا بليد
ما بنرضى ليك لو مننا أو منكم واحد ( هلك )
نزل سلاحك ود أبوي
الطلقة للعدو ما الأخو
الطلقة للخان البلد
للجوعك و( البهدلك )
أنا ما مرقت عشان خراب
أنا قلبي فاتح للمحبة وللتسامح ألف باب
أنا ود بلد
سوداني طيب ود اصول
حافظ الشرع والدين وما قال الرسول
لا بضربك لا بنهبك ( لا بقتلك )
أنا وجعتي البلد البضيع
أنا حلمي بالوطن الوسيع
نتلمى كلنا فور ... جعل
نوباوي أو حلفاوي أو ( من غير فرز )
ما هاميني جنسك
وعنو يوم ما بسألك
يا عسكري ( الموت ) ما شرف
والدم عظيم عند العظيم
ما تغبببي تكتل من طرف
رب العباد يوم الحساب
من كل قطرة دم بتنزل ( بسألك )
في إيدي وردة وحب كبير
لا بشتمك لا بنعلك
نزل سلاحك في الأرض
وأعرف بأنو الحق ( فرض )
حنقولا بالطول والعرض
مارقين عشان خاطر الوطن
مستقبلي ومستقبلك
.....